മൂന്നു നൂറ്റാണ്ടോളം എെശ്വര്യ പ്രതാപങ്ങളോടു കൂടി സ്ഥിതി ചെയ്തിരുന്ന വെള്ളയാണിയിൽ വിളയിൽ വീട് വെണ്ണിയൂരിൽ പുളിയറത്തല വീട് എന്നീ രണ്ട് ശാഖകളും അനേകം തായ്വഴികളുമുള്ള നായർ തറവാടിന്റെ പരദേവതാലയങ്ങളിൽ ഒന്നാണ് മേലതിൽ ശ്രീ മഹാഗണപതിക്ഷേത്രം. ഏതാണ്ട് നാല് നൂറ്റാണ്ടിലധികം പഴക്കമുള്ള ബാലഗണപതിയാണ് പ്രധാന പ്രതിഷ്ഠ. ഇടതും വലതുമായി മന്ത്രമൂർത്തിയേയും, യോഗീശ്വരനേയും പ്രതിഷ്ഠിച്ചിട്ടുണ്ട്. ചരപ്രതിഷ്ഠയാണ്. അഷ്ടബന്ധമിട്ട് ഉറപ്പിച്ചിട്ടുള്ളതല്ല ഗണപതി വിഗ്രഹം. അഷ്ടദ്രവ്യങ്ങളോടുകൂടിയുള്ള മഹാഗണപതിഹോമമാണ് നിത്യപൂജ. എല്ലാ ദിനവും പ്രഭാതപൂജയുണ്ട്. ലംബോദരനും, ഭക്ഷണപ്രിയനുമായ മഹാഗണപതിക്ക് ഉണ്ണിയപ്പവും, അടയും, മോദകവും, നാളികേരവും, ശർക്കരപായസവും, പാൽ പായസവും ഭക്തജനങ്ങൾ വഴിപാടായി നടത്തി വരുന്നു. ക്ഷിപ്രപ്രസാദിയായ മേലതിൽ ഗണപതിയെ ഭക്തിയോടെ പ്രാപിക്കുന്ന ഭക്തരുടെ ഏത് അഭീഷ്ടങ്ങളും സാധിച്ചു കൊടുക്കുന്നു. വിനായകചതുർത്ഥിയും, പ്രതിഷ്ഠാദിനവുമാണ് പ്രധാന ഉത്സവങ്ങൾ. മറ്റ് പുണ്യ ദിനങ്ങളിലും വിശേഷാൽ പൂജകൾ നടക്കാറുണ്ട്. കുടുംബാംഗങ്ങളും നാട്ടുകാരായ ഭക്തജനങ്ങളുടെ പ്രതിനിധികളും ഉൾപ്പെടുന്ന ട്രസ്റ്റാണ് ഭരണം നടത്തി വരുന്നത്.